Hoxe é un deses días nos que todo parece perfecto no bosque. Pero aínda que o sol brilla, o aire é suave e todo convida a xogar e pasalo ben… Pombo, o mensaxeiro, está triste. E non é para menos: volveu perder unha postal! Di que é o peor pombo mensaxeiro do mundo porque, aínda que non o queira admitir, sempre lle pasa o mesmo.
Cando a Banda do Bosque o escoita, non dubidan nin un segundo: póñense mans á obra para axudar ao seu amigo. Comeza entón unha busca por todo o bosque. Miran entre as árbores, nas pólas, no chan… pero a postal non aparece por ningún lado. Aínda así, seguen intentando animar a Pombo e atopar a postal perdida.
No medio da procura, aparece Pegui cun sorriso enorme. Quere contar algo moi importante, di que é o seu día de sorte! Pero os demais están tan concentrados en atopar a postal que non a escoitan e mesmo pensan que está sendo un pouco egoísta.
E ás veces pasa iso: cando estamos moi preocupados por algo, esquecemos escoitar aos demais, e iso tamén é moi importante!
A busca continúa, pero sen éxito. Ata que, de repente, Pegui volve aparecer. Esta vez, non vén só con palabras. Pegui atopou a Postal do señor Pombo! Grazas a ela, o mensaxeiro do bosuqe pode por fin facer a súa entrega. A destinataria é a Curuxa, que recibe unha postal moi especial da súa irmá Matilda, que vive, nada menos, que na catedral de Mondoñedo! E ademais, trae unha gran nova: pronto irá de visita.
A Curuxa queda feliz, e Pombo tamén. Porque recibir unha postal, é como recibir un pequeno agasallo.
Non perdades esta aventura no capítulo A postal de Bibopalula en Xabarin.gal.