Durante varios meses, todas as nenas e nenos que asistiron ás funcións de Bibopalula · O Espectáculo recibiron ao saír do teatro un mapa do tesouro moi especial. Nel atopaban diferentes propostas de xogo: cancións, adhesivos, pequenas probas… e unha última misión creativa. Ese mapa era unha invitación a seguir xogando e a converterse en artistas.
Ao final da aventura, propoñía algo divertidísimo: debuxar como imaxinaban que continuaba a historia despois de que a Banda do Bosque atopase o tesouro.
Para enviar eses debuxos, o mapa incluía un código QR que levaba a un formulario oculto dentro da app de Bibopalula. Alí, as nenas e nenos podían compartir as súas ilustracións de Robin, Pegui, Merli, Carpin ou Ava, vistas desde a súa propia imaxinación.
Co paso das funcións foron chegando algúns destes debuxos: obras cheas de árbores, paxaros, instrumentos, luces e cancións. Cada unha distinta, e cada unha contando un final posible para aquela aventura no bosque.
Hoxe, eses debuxos forman parte dun pequeno recuncho secreto dentro da app (dispoñible para iOS e Android), un espazo no que as nenas e nenos poden verse tamén como creadores e sentir que forman parte do universo de Bibopalula.
E agora, ese recuncho queda aberto. Se tes a aplicación descargada, a través deste enlace pódese acceder directamente á sección onde enviar novos debuxos.
A Banda do Bosque estará encantadísima de recibir novas obras de arte para seguir imaxinando novas aventuras!
