A Banda do Bosque lanza a súa nova panxoliña: Ninguén canta mal polo Nadal
A Banda do Bosque dálle a benvida ao inverno cunha canción moi especial: unha panxoliña alegre, musical e chea de espírito de Nadal titulada ‘Ninguén canta mal polo Nadal’. E si… tamén ten videoclip!
Un bosque cheo de música polo Nadal
No bosque de Bibopalula xa se escoitan as campás e as melodías suaves típicas do Nadal. E a nosa banda preferida… ten moitas ganas de cantar! Merli afinou o seu canto máis brillante, Pegui buscou unhas pólas que fan chin-chin, Carpin marcou o ritmo co seu peteiro carpinteiro… e Robin, como sempre, puxo a súa voz máis doce.
Así naceu Ninguén canta mal polo Nadal, a nova panxoliña da Banda do Bosque, que xa está dispoñible en todas as plataformas de audio e tamén ten a súa versión internacional: Christmas is here.
Unha canción para desfrutar xuntos
Composta por Andrés Mahía, Santi Jul e Iván Laxe, esta panxoliña mantén todo o espírito de Bibopalula: música accesible, ritmo luminoso e unha mensaxe moi importante para estas datas… No Nadal, o máis bonito é cantar xuntos! Non importa se desafinamos un pouquiño ou se nos equivocamos na letra: o máis especial é compartir o momento.
O lanzamento vén acompañado dun videoclip dirixido por Laura Mahía e Lucía Rodríguez Vaquero. Nel, a Banda do Bosque múdase a un escenario invernal: está cheo de neve! Ademais, o vídeo conta coa colaboración de Deleite, que sempre aposta por estas iniciativas para a cativada.
Podedes escoitar Ninguén canta mal polo Nadal (ou Christmas is here na súa versión en inglés) en todas as plataformas dixitais.