A Banda do Bosque prepárase para o seu regreso aos escenarios
Robin, Carpin, Merli e Pegui xa están afiando voces, limpando peteiros e facendo as mochilas, porque… volven os espectáculos de ‘Bibopalula’!
A Banda regresa para dar a benvida ao frío con música, historias e moita maxia. Ava, a grande observadora de paxaros e guía de todas as aventuras, volverá acompañar as pequenas e pequenos espectadores nunha viaxe polo bosque, onde cada árbore agocha unha pista e cada canto desvela un misterio. Xunto a ela, Robin, Carpin, Merli e Pegui emprenden de novo a misión encargada polo Señor Moucho: atopar un tesouro escondido entre raíces, pólas e nubes. Un percorrido teatral que combina humor, tenrura e unha estética moi recoñecible para quen segue a súa historia.
A banda piará por primera vez no Culturgal, o 30 de novembro en Pontevedra, para seguir despois o seu camiño por Vilagarcía o 20 de decembro, A Coruña o 28 de decembro, e Vigo o 2 de xaneiro de 2026. Un pequeno percorrido invernal que pecha un ano de grande voo para Bibopalula.
O espectáculo, dirixido e escrito por Marta Lado, conta de novo coa interpretación de Lidia Veiga como Ava e co elenco formado por Cristina Andrade, Graciela Carlos, Sara Ferro e Nerea Rodríguez, que dan vida á Banda do Bosque. A peza inclúe as xa recoñecidas cancións dos paxariños con ritmos, brincadeiras e xogos que convidan a cantar e bailar.
Pensado para nenas e nenos de entre 2 e 6 anos, Bibopalula · O Espectáculo, consolídase como unha experiencia inmersiva que transforma o teatro nun bosque vivo e que permite á cativada seguir descubrindo o universo da Banda fóra da pantalla. As entradas para as funcións xa están dispoñibles!
