O bosque de Bibopalula amenceu revolucionado. Hai moito movemento entre as árbores, os paxaros van e veñen sen descanso e ata as bolboretas parecen saber que algo importante está a piques de suceder.
Merli está especialmente nervioso. Quedou con Robin para asistir a un acontecemento moi especial, pero o seu amigo chega cun problema inesperado: esqueceu a frauta na casa! E nun día coma este non hai tempo que perder. Mentres Robin marcha correndo a buscala, Carpin e Pegui xa os esperan xunto ao vello carballo cos seus instrumentos preparados. Pero… que está pasando exactamente?
A resposta ten que ver cun dos momentos máis especiais da vida no bosque. Un enorme ovo leva días descansando no niño da cegoña e parece que por fin chegou o gran momento. Todos observan con atención, agardando algún sinal.
Non é casualidade que esta aventura chegue agora. Coa chegada de xuño, os niños de cegoña están cheos de actividade. Durante estas semanas, moitos polos comezan a medrar e a prepararse para dar os seus primeiros pasos, convertendo esta época nun momento moi especial para observar a natureza.
Conseguirán os amigos chegar a tempo para presenciar o acontecemento? E que sorpresas lle agardarán á pequena cegoña?
Non perdades esta aventura no capítulo O ovo máis grande do mundo de Bibopalula en Xabarin.gal.