No bosque de Bibopalula hai motivos para cantar e bailar! As cancións de Robin, Pegui, Merli e Carpin veñen de recibir unha noticia moi especial: son finalistas nos XXIV Premios Mestre Mateo, concorrendo na categoría de Mellor Serie de Televisión e Mellor Música Orixinal.
Cancións que nacen no bosque
Desde o primeiro día, a música foi unha parte fundamental de Bibopalula. Cada episodio remata cunha canción que acompaña as aventuras da Banda do Bosque mentres descobre a natureza, os seus cambios e os pequenos segredos que agocha.
Ao longo da serie, foron nacendo nada menos que 52 cancións orixinais, que forman parte do álbum A Banda do Bosque. Todas elas están dispoñibles para escoitar en plataformas como Spotify, YouTube ou Apple Music, para seguir cantando tamén fóra da pantalla. Ademais, a Banda preparou unha panxoliña moi especial este inverno: Ninguén canta mal polo Nadal.
As músicas están compostas por Santi Jul e Iván Laxe, que conseguiron crear un universo sonoro cheo de ritmo, alegría e curiosidade, pensado especialmente para as máis pequenas e pequenos da casa.
Unha aventura que segue medrando
Este ano, Bibopalula é finalista en dúas categorías: Mellor Serie de Televisión e Mellor Música Orixinal. Un paso máis nun camiño que xa trouxo moitas alegrías, como o Premio Deleite á Promoción da Lingua, recibido o ano pasado polo seu compromiso co galego desde as primeiras idades.
A música da Banda do Bosque tamén deu o salto fóra de Galicia grazas a un acordo internacional con Animotion Media, que permitirá que as súas cancións cheguen a novos lugares e novas familias.
Agora só queda esperar á gran festa final: a gala dos Premios Mestre Mateo, que se celebrará o 21 de marzo en Lugo. Robin, Pegui, Merli e Carpin xa están afinando instrumentos…
E ti, xa tes unha canción favorita da Banda do Bosque?