A Coruña e Santiago acollen esta fin de semana as primeiras funcións do primeiro musical infantil en galego, protagonizado por Lidia Veiga e dirixido por Marta Lado.
Chega a gran estrea do espectáculo de Bibopalula!
Nunca unha proposta teatral infantil xerara tanta expectación… E chegou o momento! O Teatro Colón da Coruña e o Auditorio ABANCA de Santiago acollen este sábado e domingo os primeiros dous pases do gran espectáculo de Bibopalula, a serie de debuxos máis vista de Xabarin.gal desde o pasado mes de novembro.
Robin, Carpin, Merli e Pegui prepáranse para coñecer ao seu público en dúas tardes cheas de sorpresas: moitas cancións, bailes, ou agasallos ao remate das representacións para todo o público infantil asistente. Non faltarán tampouco á cita outros personaxes ben coñecidos polo público da Banda do Bosque, como Pombo ou o Señor Moucho.
As últimas entradas para as dúas primeiras funcións da xira están aínda á venda, e é posible mercar tamén as das outras seis localidades polas que pasará o espectáculo todas as fines de semana do mes de xuño.