No bosque de Bibopalula hai alguén que sempre sabe o que está pasando. Se aparece unha novidade, un plan ou unha boa historia, seguro que Pegui, a pega da Banda do Bosque, xa o sabe… e probablemente tamén teña algo que dicir ao respecto.
Pegui é curiosa, culta e moi observadora. Gústalle estar ao tanto de todo o que acontece entre as árbores, e tamén manter o seu niño impecable: para ela, a organización e o estilo son cousas moi importantes. De feito, é quen ten a casa máis bonita e ordenada de todo o bosque.
Pero este pequeno paxaro non só se fixa nos detalles. Tamén ten un gusto moi especial pola beleza da natureza: ás veces queda abraiada co brillo das follas ao sol, coas cores das flores, co son do vento… Pero tamén consigo mesma! Comprobando que as súas plumas azuis estén sempre a punto para lucilas. É que o estilo tamén é moi importante cando formas parte dunha banda.
E, por suposto, Pegui está convencida dunha cousa: canta marabillosamente. Quizais os seus amigos teñan outras opinións… pero ela non ten ningunha dúbida.
